༄༅། །བློ་སྦྱོང་སྨོན་ལམ་བཞུགས་སོ།།
དཀའ་ཆེན་ཡེ་ཤེས་རྒྱལ་མཚན་གྱིས།
ན་མོ་གུ་རུ་བཛྲ་དྷ་རཱ་ཡ།
ཐུགས་རྗེའི་བདག་ཉིད་རྩ་བརྒྱུད་བླ་མ་དང་།།
ཡི་དམ་མཆོག་གསུམ་བཀའ་སྡོད་བཅས་ལ་འདུད།།
བདག་པས་གཞན་གཅེས་སེམས་མཆོག་རིན་པོ་ཆེ།།
མྱུར་དུ་རྒྱུད་ལ་སྐྱེས་བར་བྱིན་གྱིས་རློབས།།
སྔོན་བསགས་སྟོབས་ཀྱིས་དལ་བའི་རྟེན་ཐོབ་ཀྱང་།།
སྔོན་ཆད་འདི་ནང་བྱ་བས་གཡེངས་ཤིང་འདས།།
ད་ནི་གཏན་གྱི་མདུན་མ་བསྒྲུབ་པའི་ཕྱིར།།
ཚེ་ལྷག་དོན་ལྡན་ནུས་པར་བྱིན་གྱིས་རློབས།།
སྟོན་པ་མཉམ་མེད་དེ་ཡི་བསྟན་པ་ལ།།
ཞུགས་ཀྱང་ཉེས་ལྟུང་དྲི་མས་སེམས་རྒྱུད་སྦགས།།
ཕྱིན་ཆད་ངེས་འབྱུང་སེམས་ཀྱིས་རྒྱུད་བསྐུལ་ཏེ།།
ཚུལ་ཁྲིམས་ཕུང་པོ་ཡོངས་སུ་རྫོགས་པར་ཤོག།།
ཟབ་རྒྱས་ཐེག་ཆེན་ཆོས་ཚུལ་མང་ཐོས་ཀྱང་།།
དུད་འགྲོ་ལྟ་བུར་རང་དོན་སྤྱོད་པས་འདས།།
ཁྲེལ་མེད་བདག་ལ་བླ་མས་ཐུགས་རྗེས་གཟིགས།།
བྱམས་དང་སྙིང་རྗེ་འབྱོངས་པར་བྱིན་གྱིས་རློབས།།
སྔོན་བྱོན་རྒྱལ་བ་ཀུན་གྱིས་གཤེགས་པའི་ཤུལ།།
རྒྱལ་སྲས་དམ་པ་ཀུན་གྱི་ཐུགས་དམ་མཐིལ།།
བྱམས་དང་སྙིང་རྗེ་བྱང་སེམས་རིན་པོ་ཆེ།།
མྱུར་དུ་རྒྱུད་ལ་སྐྱེ་བར་བྱིན་གྱིས་རློབས།།
སྔོན་ཚེ་ཐུབ་པས་ཇི་ལྟར་མཛད་པ་ལྟར།།
འགྲོ་བའི་སྡིག་དང་སྡུག་བསྔལ་མ་ལུས་པ།།
བདག་ཉིད་གཅིག་པུས་མྱོང་བར་སྤྲོ་བྱེད་ཅིང་།།
བདེ་དགེ་མ་ལུས་འགྲོ་ལ་གཏོང་བར་ཤོག།།
སྔོན་ཚེ་མཛའ་བོའི་བུ་མོར་འཁྲུངས་པའི་ཚེ།།
འགྲོ་ཀུན་སྡུག་བསྔལ་རྒྱུད་སྟེང་བཞེས་པ་བཞིན།།
སེམས་ཅན་ཀུན་གྱི་སྡུག་བསྔལ་མ་ལུས་པ།།
གཅེས་འཛིན་བདག་གི་སྟེང་དུ་སྨིན་གྱུར་ཅིག།།
དམྱལ་བའི་གྱད་དུ་འཁྲུངས་ཚེ་འགྲོ་ཀུན་གྱི།།
ངན་སོང་སྐྱེ་སྒོ་གཅོད་པའི་ཐུགས་བསྐྱེད་ལྟར།།
འགྲོ་བའི་སྡིག་དང་སྡུག་བསྔལ་མ་ལུས་པ།།
བདག་ལ་སྨིན་ནས་ངན་སོང་སྟོངས་གྱུར་ཅིག།།
དྲང་སྲོང་བཟོད་བ་སྨྲ་བའི་རྣམ་ཐར་ལྟར།།
བདག་ལ་མི་སྙན་བརྗོད་ཅིང་མཚོན་འདེབས་ཀྱང་།།
བུ་སྡུག་ཤི་བའི་མ་བཞིན་ལྷག་པར་དུ།།
དེ་ལ་བརྩེ་བས་ཕན་འདོགས་ནུས་པར་ཤོག།།
བྱམས་པའི་སྟོབས་ཀྱིས་གནོད་སྦྱིན་སྤུན་ལྔ་ལ།།
ཇི་ལྟར་མཛད་པ་དེ་བཞིན་བདག་གིས་ཀྱང་།།
སྡིག་ཅན་མ་ལུས་གནས་སྐབས་མཐར་ཐུག་ཏུ།།
ཕན་དང་བདེ་བའི་ལམ་ལ་འགོད་པར་ཤོག།།
བྱང་སེམས་ཟླ་བས་སྡིག་ཅན་སྲིན་པོའི་ཚོགས།།
དམ་པའི་ཆོས་ཀྱིས་འདུལ་བར་མཛད་པ་བཞིན།།
བླུན་རྨོངས་སྡིག་ཅན་འགྲོ་བ་མ་ལུས་པ།།
བདག་ཉིད་གཅིག་པུས་འདུལ་བར་ནུས་གྱུར་ཅིག།།
རྒྱལ་པོ་བསོད་ནམས་སྟོབས་ཀྱིས་ལུས་ཀྱི་ཤས།།
གྲངས་མེད་འགྲོ་བ་ཚིམས་པར་མཛད་པ་ལྟར།།
བདག་གི་ལུས་ཀྱང་རྣམ་པ་ཐམས་ཅད་དུ།།
འགྲོ་བ་ཀུན་གྱི་ཉེར་འཚོར་འགྱུར་བར་ཤོག།།
སེམས་དཔའ་ཆེན་པོ་རུས་སྦལ་གཙོ་བོ་རུ།།
གྱུར་ཚེ་ཚོང་པ་མཚོ་ལས་བསྒྲལ་བ་ལྟར།།
འགྲོ་བ་མ་ལུས་འཁོར་བའི་མཚོ་ཆེན་ལས།།
སྒྲོལ་བའི་ཟམ་སྟེགས་ཉིད་དུ་བདག་འགྱུར་ཤོག།།
རི་བོང་གཙོ་བོར་འཁྲུངས་ཚེ་ཐབས་མཁས་ཀྱིས།།
གྲངས་མེད་འགྲོ་བ་སྨིན་པར་མཛད་པ་ལྟར།།
བདག་ཉིད་མཐོང་ཐོས་དྲན་རེག་མ་ལུས་པ།།
ཐམས་ཅད་སྨིན་གྲོལ་ལམ་ལ་འགོད་གྱུར་ཅིག།།
མགོན་མེད་སྙིགས་དུས་འགྲོ་རྣམས་བསྒྲལ་བའི་ཕྱིར།།
རྒྱ་མཚོའི་རྡུལ་གྱིས་སྨོན་ལམ་ལྔ་བརྒྱ་དག།།
ཇི་ལྟར་མཛད་པ་དེ་བཞིན་བདག་གིས་ཀྱང་
སྨོན་ལམ་མ་ལུས་ཡོངས་སུ་རྫོགས་པར་ཤོག།།
བདེ་བ་ཅན་གྱི་ཞིང་མཆོག་འགྲུབ་པའི་ཕྱིར།།
འཁོར་ལོས་སྒྱུར་རྒྱལ་རྩིབས་ཀྱི་མུ་ཁྱུད་ཀྱིས།།
རྫོགས་སྨིན་སྦྱངས་གསུམ་སྤྱོད་པ་ཅི་མཛད་པ།།
དེ་བཞིན་བདག་གི་སྤྱོད་པའང་རྫོགས་པར་ཤོག།།
མི་ཕམ་མགོན་དང་འཇམ་དཔལ་དཔའ་བོ་དང་།།
ཀུན་ཏུ་བཟང་དང་ནམ་མཁའི་སྙིང་པོ་སོགས།།
མཐུ་ཆེན་རྒྱལ་སྲས་རྣམས་ཀྱི་སྤྱོད་པ་ཡི།།
རྗེས་སུ་བདག་ཀྱང་སློབ་པ་ཉིད་གྱུར་ཅིག།།
བདེ་གཤེགས་ཆོས་ཀྱི་སྐུ་མངའ་སྲས་བཅས་ཀྱི།།
ཐུགས་རྗེ་ནུས་པ་དཔག་ཏུ་མེད་པ་དང་།།
རྟེན་ཅིང་འབྲེལ་འབྱུང་བསླུ་བ་མེད་པའི་མཐུས།།
བདག་གི་སྨོན་པའི་གནས་འདི་འགྲུབ་གྱུར་ཅིག།།
ཅེས་