༄༅། །སྡིག་མུན་སེལ་བྱེད་ཟླ་བའི་འོད་ཟེར།
རྗེ་བཙུན་བློ་བཟང་ཆོས་ཀྱི་རྒྱལ་མཚན་གྱིས།
ན་མོ་གུ་རུ་ཤཱཀྱ་མུ་ན་ཡེ།
དུས་གསུམ་ཕྱོགས་བཅུར་བཞུགས་པ་ཡི།།
སངས་རྒྱས་སྲས་དང་བཅས་རྣམས་ལ།།
བྱང་ཆུབ་སྙིང་པོར་མཆིས་ཀྱི་བར།།
གུས་པས་སྐྱབས་སུ་མཆི་བར་བགྱི།།
བསླུ་མེད་སྐྱབས་ཀྱི་མཆོག་རྣམས་ལ།།
ཐལ་མོ་སྦྱར་ཏེ་གསོལ་བ་ནི།།
ཚེ་རབས་འདི་འམ་གཞན་དག་ཏུ།།
ཉོན་མོངས་དུག་གསུམ་དབང་གྱུར་པས།།
མཚམས་མེད་ལྔ་དང་ཉེ་པ་ལྔ།།
མི་དགེའི་ལམ་བཅུ་བགྱིས་པ་རྣམས།།
ལུས་དང་ངག་དང་ཡིད་སྒོ་ནས།།
བསམ་པ་ཐག་པས་མགོན་ལ་བཤགས།།
དཀོན་མཆོག་གསུམ་དང་བླ་མ་དང་།།
ཕ་མ་སོགས་དང་གཞན་དག་ལའང་།།
གནོད་ཅིང་འཚེ་བ་ཅི་བགྱིས་པ།།
ཐམས་ཅད་སྙིང་ནས་བཤགས་པར་བགྱི།།
འཇིགས་རུང་དམྱལ་བ་ཡི་དྭགས་དང་།།
དུད་འགྲོ་མཐའ་འཁོབ་ཀླ་ཀློ་དང་།།
གླེན་ལྐུགས་ལོག་ལྟ་ཅན་སོགས་སུ།།
སྐྱེ་འགྱུར་ལས་ངན་མ་ལུས་བཤགས།།
ནོར་དང་ལང་ཚོ་སྟོབས་སོགས་ཀྱི།།
ང་རྒྱལ་དྲེགས་པས་གཞན་དག་ལ།
བརྙས་ཤིང་རྣམ་པར་འཚེ་བྱས་པ།།
ཐམས་ཅད་ཀྱང་ནི་བཤགས་པར་བགྱི།།
མདོར་ན་མངོན་མཐོ་ངེས་ལེགས་དང་།།
ཀུན་མཁྱེན་ཡང་དག་འགྲུབ་པའི་གེགས།།
མི་ཤེས་དབང་གིས་བསགས་པ་རྣམས།།
ཤིན་ཏུ་འགྱོད་པའི་སེམས་ཀྱིས་བཤགས།།
བཅས་པ་དང་ནི་རང་བཞིན་གྱི།།
ཁ་ན་མ་ཐོ་སྡིག་པའི་ལས།།
བགྱིས་དང་བགྱིད་བསྩལ་ཡི་རང་བ།།
ཅི་མཆིས་ཡོངས་སུ་བཤགས་པར་བགྱི།།
ཐུགས་རྗེ་ཆེ་ལྡན་རྒྱལ་རྣམས་དང་།།
རྒྱལ་སྲས་བདག་ཉིད་ཆེ་རྣམས་ཀྱིས།།
སྡིག་ལྡན་བདག་ལ་བརྩེར་དགོངས་ལ།།
ཉེས་ཀུན་དག་པར་མཛད་དུ་གསོལ།།
སྔོན་ཆད་མི་དགེ་བགྱིས་པ་ལ།།
དུག་འཐུངས་བཞིན་དུ་འགྱོད་སེམས་ཀྱིས།།
སླན་ཆད་སྲོག་གི་ཕྱིར་ཡང་ནི།།
སྐད་ཅིག་ཙམ་ཡང་མི་བགྱིད་དོ།།
དེ་ལྟར་བཤགས་ཤིང་བསྡོམས་པ་ཡི།།
བསོད་ནམས་བདག་གིས་ཅི་ཐོབ་པ།།
དེས་ནི་བདག་དང་འགྲོ་བ་ཀུན།།
མྱུར་དུ་བྱང་ཆུབ་ཐོབ་གྱུར་ཅིག།།
ཅེས། སྡིག་
ཨོཾ་བདེ་ལེགས་སུ་གྱུར་ཅིག །
སྟོན་པ་མཉམ་མེད་ཤཱཀྱའི་རྒྱལ་པོ་དང་།།
རྒྱལ་ཚབ་དམ་པ་མི་ཕམ་འཇམ་པའི་དབྱངས།།
ཤིང་རྟ་ཆེན་པོ་ཀླུ་སྒྲུབ་ཐོགས་མེད་སོགས།།
རྩ་བརྒྱུད་བླ་མ་རྣམས་ལ་གུས་ཕྱག་འཚལ།།
བདག་གིས་དུས་གསུམ་བསགས་པའི་དགེ་བའི་མཐུས།།
སྡུག་བསྔལ་གསུམ་གྱིས་མནར་བའི་འགྲོ་བ་ཀུན།།
རྟག་ཏུ་ལྷ་དང་མི་ཡི་རྟེན་ཐོབ་ནས།།
ཐར་པའི་གྲོང་ཁྱེར་དམ་པར་འཇུག་གྱུར་ཅིག།།
འདི་ལྟར་བསྐྲུན་པའི་དགེ་ཚོགས་གང་གཱའི་རྒྱུན།།
མར་གྱུར་བསོད་ནམས་བྱེ་བའི་ཆུ་ཕྲན་དང་།།
ལྷན་ཅིག་ཀུན་མཁྱེན་ཆོས་ཀྱི་རྒྱ་མཚོ་ཆེར།།
ཞུགས་ནས་ཕན་བདེ་འཕེལ་བའི་རྒྱུར་གྱུར་ཅིག།།
དེ་མ་ཐོབ་པའི་ཚེ་རབས་ཀུན་ཏུ་ཡང་།།
ངན་སོང་གནས་སུ་ནམ་ཡང་མི་སྐྱེ་བར།།
དལ་འབྱོར་རྟེན་བཟང་བསླབ་གསུམ་ནོར་གྱིས་ཕྱུག།།
ཐམས་ཅད་གཟིགས་པའི་གོ་འཕང་མྱུར་ཐོབ་ཤོག།།
སྲས་བཅས་རྒྱལ་བའི་ཐུགས་རྗེའི་བྱིན་རླབས་དང་།།
དྲང་སྲོང་གྲུབ་པ་རྣམས་ཀྱི་བདེན་ཚིག་དང་།།
ཆོས་དབྱིངས་འགྱུར་བ་མེད་པའི་བདེན་པ་ཡིས།།
རྣམ་དག་སྨོན་པའི་གནས་འདི་འགྲུབ་པར་ཤོག།།
ཅེས། སྨོན་
ཨོཾ་སྭསྟི།
ཕན་བདེའི་འབྱུང་གནས་རྒྱལ་བསྟན་ཡོངས་འདུའི་ལྗོན།།
རབ་རྒྱས་འགྲོ་ཀུན་ཐར་མཆོག་འབྲས་བཟང་ལ།།
སྤྱོད་ཕྱིར་བཀྲ་ཤིས་ལྷུན་གྲུབ་ཆོས་གྲྭ་ཆེར།།
ཆོས་སྦྱིན་འཛད་མེད་དལ་འགྲོའི་རྒྱུན་འདི་སྤེལ།།
སརྦ་ཛ་ག་ཏཾ།།